ITIFAKI YA MATUMIZI YA BENDERA YA

1.0.1 Katiba ya Chama Cha Mapinduzi ibara ya 3 inaainisha wazi wazi umuhimu na nafasi ya bendera kama ifuatavyo: Bendera ya CCM itakuwa rangi ya kijani kibichi ambayo itakuwa na alama ya jembe (alama ya mkulima) na nyundo (alama ya mfanyakazi) kwenye pembe ya juu upande wa mlingoti.

1.0.2 Ni dhahiri basi kuwa bendera hiyo ni alama muhimu iliyobuniwa ili kuwa kielelezo cha umoja pamoja na kudhihirisha azma na madhumuni ya CCM ya kutetea haki na maslahi ya wakulima na wafanyakazi.

1.0.3 Wakati wa mfumo wa chama kimoja, bendera ya Chama ilitumika kwa matumizi rasmi tu kwenye ofisi za Chama, magari ya viongozi na ofisini kwenye meza za viongozi husika n.k. Hata hivyo, baada ya kuingia kwa mfumo wa vyama vingi, bendera hiyo imejikuta ikitumika pia kwa shughuli za kiuenezi na hamasa, hasa wakati wa kampeni za Uchaguzi wa Dola. Katika mazingira hayo, wanachama na wapenzi wa CCM huitumia bendera hiyo kwenye baiskeli, majumbani mwao, vijiweni mwao, kwenye magari yao na hata wenyewe tu mmoja mmoja kupeperusha mikononi au hata kuivaa. Pia, bendera hiyo hutumika kwa mapambo kwenye mikutano ya hadhara na shughuli nyingine za Chama.

1.0.4 Kwa kuzingatia kwamba matumizi yote hayo yana manufaa makubwa kwake, Chama kimeamua kutoa itifaki hii ili iwe mwongozo rasmi wa matumizi ya bendera hii ya Chama. Kimsingi, itifaki hii inabainisha matumizi mawili makubwa ya bendera hii. Matumizi hayo ni yale rasmi kwa ajili ya ofisi na vingozi wa Chama kwa upande mmoja, na yale ya uenezi na uhamasishaji kupitia wanachama wa kawaida, wapenzi na mashabiki wa CCM kwa upande wa pili.

2.0.0 MATUMIZI RASMI YA BENDERA YA CCM

2.0.1 Bendera kwa ajili ya matumizi rasmi zitakuwa za aina mbili kuu zifuatazo:-

(a) Bendera za Viongozi Wakuu wa CCM

(b) Bendera za Viongozi Wengine wa Chama na Majengo ya Ofisi za Chama

2.1.0 Bendera za Viongozi Wakuu wa CCM

2.1.1 Bendera hizi zitakuwa na utepe wa rangi ya manjano upande wa mlingoti na zitapambwa kwa urembo wa nyuzi za rangi hiyo hiyo kuizunguka bendera yote ukiondoa ule upande wa mlingoti utakaokuwa na utepe.

2.1.2 Bendera za aina hii zitapeperushwa na viongozi wakuu wafuatao tu:-

(a) Mwenyekiti wa Chama Cha Mapinduzi.

(b) Makamo wawili wa Mwenyekiti wa Chama Cha Mapinduzi.

(d) Mgombea Urais wa Jamhuri ya Muungano wa Tanzania, Mgombea Urais wa Zanzibar na Mgombea Mwenza wa Jamhuri kwa tiketi ya Chama Cha Mapinduzi wakati wa kampeni ya Uchaguzi Mkuu wa Dola, au chaguzi nyingine zozote ambapo Chama kitakuwa na Mgombea au Wagombea wa nafasi hizo.

2.1.3 Bendera hizi za Viongozi Wakuu zitatumika kama ifuatavyo:-

(a) Kwenye gari la Kiongozi kwa kuegeshwa kwenye mlingoti upande wa kushoto wa mbele wa gari hilo, wakati wote awapo ndani ya gari safarini.

(b) Bendera ya aina hiyo hiyo iliyotengenezwa kwa ajili ya kuwekwa mezani itakuwa mezani kwenye meza ya ofisi ya Kiongozi wakati wote kwani ni udhihirisho wa mamlaka yake.

(c) Bendera ya mezani itatumika pia na kuwepo mezani wakati wa mikutano yote ya chama na wakati wa mazungumzo baina ya CCM na chama au vyama vingine, mfano vyama rafiki na vya kidugu.

(d) Bendera kubwa nyumbani kwa Kiongozi Mkuu na kwa kuegesha ofisini mwake.

(a) Makatibu wa Halmashauri Kuu ya Taifa wanaoongoza Idara za Chama.

(b) Wenyeviti na Makatibu Wakuu wa Jumuiya za CCM ngazi ya Taifa.

(d) Wajumbe wa Halmashauri Kuu ya Taifa ya CCM, Wenyeviti na Makatibu wa CCM wa Mikoa na Wilaya.

(e) Wabunge na Wajumbe wa Baraza la Wawakilishi wanaotokana na CCM.

(f) Makatibu wa CCM wa Majimbo, Kata/Wadi na Matawi.

2.2.3 Ofisi za Chama zitazostahiki kupeperusha bendera hizi ni za ngazi zote kuanzia Shina (yakiwemo Mashina ya Wakereketwa na Maskani) hadi Taifa. Ofisi za Jumuiya za Chama na taasisi nyingine za Chama zitastahiki kupeperusha bendera za Chama za matumizi rasmi.

2.3.0 Vipimo Vya Bendera za Chama Kwa Ajili ya Matumizi Rasmi

2.3.1 Bendera za Chama kwa ajili ya matumizi rasmi zitakuwa na vipimo vifuatavyo:-

	AINA YA BENDERA KWA MUJIBU WA MATUMIZI	VIPIMO (milimita)
	AINA YA BENDERA KWA MUJIBU WA MATUMIZI	Urefu	Upana
1	Bendera za Mashina	1350	900
2	Bendera za ofisi nyingine zote za Chama, Jumuiya na Taasisi zake	1800	1200
3	Bendera za majumbani na kuegesha ofisini kwa Viongozi Wakuu	1800	1200
4	Bendera za mezani	220	150
5	Bendera za magari na vyombo vingine vya usafiri	300	200

2.4.0 Masharti ya Matumizi Rasmi ya Bendera:-

2.4.1 Matumizi rasmi ya bendera ya CCM yataambatana na masharti yafuatayo:-

(a) Bendera ziwe za vipimo vilivyobainishwa.

(b) Zitundikwe kwenye milingoti rasmi. Kwa Mashina ya majumbani zinaweza kutundikwa juu ya nyumba husika kulingana na mazingira ya pahala.

(c) Kwenye magari, bendera zipeperushwe kwenye mlingoti rasmi wa gari, usawa wa mkono wa kushoto wa gari husika. Bendera iondolewe au kufunikwa isipepee mara tu kiongozi anapokuwa halitumii kwa muda mfupi au mrefu gari hilo.

(d) Kiongozi anapoendesha mwenyewe gari asipeperushe bendera ya matumizi rasmi.

(e) Ukiondoa bendera za kwenye magari ambazo hazitopepea wakati kiongozi hayumo garini, bendera nyingine zote za CCM zitapepea wakati wote. Isipokuwa kwamba, pale ambapo bendera ya CCM inapepea sambamba na bendera ya Taifa, utafuatwa utaratibu wa bendera ya Taiufa wa kupandisha na kushusha bendera.

2.5.0 Mtoaji wa Bendera

2.5.1 Bendera zote kwa matumizi rasmi zitatengenezeshwa na kutolewa na Makao Makuu ya CCM pekee na zitatengenezwa kwa kutumia vitambaa rasmi vilivyothibitishwa na Shirika la Viwango (TBS). Vitambaa hivyo ni Pantone 109C (Kijani) na Pantone 256 C (manjano).

3.0.0 MATUMIZI KWA AJILI YA UENEZI WA CHAMA

3.0.1 Bendera za CCM kwa ajili ya matumizi ya uenezi na hamasa hazitokuwa na utepe wala urembo wa aina yoyote. Zitaweza kutumiwa na wanachama, wapenzi na mashabiki wa CCM wakati wote ama kwa kupeperusha wenyewe mikononi, kwenye baiskeli zao, pikipiki, magari, sehemu zao za kazi, za mazungumzo, nyumbani n.k. Bendera hizi pia ndizo zitakazotumika kwa ajili ya kupamba maeneo ya mikutano na shughuli nyingine za Chama.

3.1.0 Masharti

3.1.1 Bendera hizi hazitohusika na masharti yote yaliyobainishwa kwa ajili ya matumizi rasmi, isipokuwa yale yaliyoainishwa kwenye Katiba ya CCM kwa mujibu wa Ibara ya 3.

3.2.0 Mtoaji wa Bendera

3.2.1 Bendera hizi zitaweza kutengenezeshwa na/au kutolewa na ofisi za CCM za Mikoa na Wilaya au kwa ruhusa/idhini za ofisi hizo.